एसटी कर्मचाऱ्यांना दिवाळी भेट म्हणून २० हजार रुपये देण्याची मागणी
महाराष्ट्र एसटी कर्मचारी काँग्रेसचे परिवहन मंत्री प्रताप सरनाईक यांना निवेदन
मुंबई :
वाढती महागाई आणि इतर आस्थापनांमधील कर्मचाऱ्यांना जाहीर करण्यात आलेल्या दिवाळी भेटीच्या पार्श्वभूमीवर, महाराष्ट्र राज्य मार्ग परिवहन महामंडळातील (एसटी) कर्मचाऱ्यांना यंदा दिवाळी भेट म्हणून २० हजार रुपये देण्यात यावेत, अशी मागणी महाराष्ट्र एसटी कर्मचारी काँग्रेसच्या वतीने करण्यात आली आहे. यासंदर्भातील निवेदन परिवहन मंत्री तथा एसटी महामंडळाचे अध्यक्ष प्रताप सरनाईक यांना देण्यात आले.
मंत्री प्रताप सरनाईक हे मुंबई सेंट्रल येथील एसटी महामंडळाच्या मुख्यालयात आले असताना संघटनेच्या पदाधिकाऱ्यांनी त्यांची भेट घेऊन हे निवेदन सादर केले.
एसटी कर्मचाऱ्यांना दरवर्षी दिवाळीनिमित्त आर्थिक स्वरूपात भेट दिली जाते. मात्र, यंदा वाढलेली महागाई लक्षात घेता कर्मचाऱ्यांना दिल्या जाणाऱ्या दिवाळी भेटीच्या रकमेत वाढ करणे आवश्यक आहे. राज्यातील इतर आस्थापनांमधील कर्मचाऱ्यांना जाहीर करण्यात आलेल्या रकमेच्या तुलनेत एसटी कर्मचाऱ्यांनाही सन्मानजनक रक्कम मिळावी, अशी भूमिका संघटनेने निवेदनातून मांडली आहे.
यंदा ६ नोव्हेंबर २०२६ पासून दिवाळी सणाला सुरुवात होत असल्याने, सणापूर्वीच ऑक्टोबर महिन्याचे वेतन आणि दिवाळी भेटीची रक्कम कर्मचाऱ्यांच्या खात्यात जमा करण्यात यावी, अशी मागणीही संघटनेच्या वतीने करण्यात आली आहे.
यावेळी महाराष्ट्र एसटी कर्मचारी काँग्रेसचे सरचिटणीस श्रीरंग बरगे यांच्यासह संतोष गायकवाड, राजेंद्र वाहटूळे, बालाजी जाधव, डेनिस फर्नांडिस, दीपक म्हात्रे, संदीप गोसावी, दीपक म्हात्रे, धनंजय पाटील, सुगंधा हिले, विधी पवार, नीलम रोकडे, सुमन ढेबरे, धीरज म्हात्रे आणि हनुमंत पाटील, आदी पदाधिकारी व कार्यकर्ते मोठ्या संख्येने उपस्थित होते.
