Mumbai shree : ठरला साजिद मलिक

मुंबई : 

नवोदित मुंबई श्रीच्या निमित्ताने गोरेगावचे शास्त्रीनगर मैदान शरीरसौष्ठवपटू आणि क्रीडाप्रेमींच्या गर्दीने अक्षरशा ओसंडून वाहत होतं. स्पर्धा नवोदितांची असली तरी स्पर्धेला लाभलेला अभूतपूर्व आणि विक्रमी प्रतिसाद बृहनमुंबई शरीरसौष्ठव संघटनेची वाढलेली खरी ताकद दाखवून गेला. रात्री अकराच्या ठोक्याला नवोदित मुंबई श्रीचा मान विराज फिटनेसच्या साजिद मलिकने मिळवला. सर्वात महत्वाचे म्हणजे साजिदचे अभिनंदन करण्यासाठी सभागृहात हजारो दर्दी क्रीडाप्रेमी उपस्थित होते.

नवोदित मुंबई श्रीच्या आयोजनाचा दिवस शरीरसौष्ठव स्पर्धेचा इतिहासात संस्मरणीय ठरला. नवोदित मुंबई श्रीसारख्या जिल्हास्तरीय आणि नवख्या आणि उदयोन्मुख खेळाडूंच्या स्पर्धेला दीडशे स्पर्धकांची अपेक्षा असताना प्रत्यक्षात २३५ पीळदार नवोदितांचा सहभाग थक्क करणारा होता. त्यातच शास्त्रीनगर मैदानाची क्षमता २ हजार असताना चक्क ३ हजारांपेक्षा अधिक क्रीडाप्रेमी आणि त्याच्या दुप्पट क्रीडांगणाच्या आवारात ताटकळत उभे होते.

स्पर्धकांच्या आणि प्रेक्षकांच्या प्रचंड प्रतिसादामुळे शास्त्रीनगर मैदान फारच छोटे वाटू लागले होते. सात वजनी गटाच्या या स्पर्धेत २३५ शरीरसौष्ठवपटूंच्या सहभागामुळे स्पर्धा काहीकाळ लांबली. सर्वात आश्चर्याचे म्हणजे स्पर्धेत खेळाडूंची संख्या अनपेक्षितपणे वाढली तरी स्पर्धेचा दर्जा फारच उंचावलेला दिसला. जणू ही स्पर्धा मुंबई श्रीच आहे, याच दृष्टीने प्रत्येक खेळाडू तयारीत दिसत होता.

Mumbai Shree चा फैसला वेळतच

सार काही अभूतपूर्व असल्यामुळे स्पर्धा तासभर उशीरा सुरू झाली. तरीही शरीरसौष्ठव संघटनेच्या पदाधिकारी आणि पंचांनी नवोदित मुंबई श्रीचा फैसला वेळतच लावला. प्रत्येक गटात ४०-४५ खेळाडू तर ६० किलो आणि ६५ किलो वजनीगटात स्पर्धकांच्या संख्येने अर्धशतक ओलांडले होते. या प्रचंड संख्येमुळे टॉप फाइव्ह निवडताना पंचांची चांगलीच पंचाईत झाली. ५५ किलो वजनी गटात इतकी चुरस होती की अव्वल पाच खेळाडू निवडताना जजेसना तीन-तीनदा कंपेरिजन करावी लागली. तसेच त्यांच्यात क्रमांक ठरविताना आणखीनच डोकेफोड करावी लागली. दर्शन सावंत आणि अर्णव वाघ या जोडीला मागे टाकत बोवलेकर जिमचा रमण राठोड सरस ठरला. ६० किलो वजनी गटात धर्मराज जमादारने बाजी मारली. ६५ किलोमध्ये प्रतिक महाजन, ७० किलोत खुद्द साजिद मलिक आणि ७५ किलोवरील वजनी गटात परब फिटनेसचा फ्रान्सिसको फर्नांडिस अव्वल आला. ७० किलो वजनी गटात अमन भौमिकवर मात करत गटात पहिला आलेला साजिद मलिकच स्पर्धेचा विजेता ठरला.

हेही वाचा : Cancer : राज्यात नागरिकांना मिळणार त्रिस्तरीय कर्करोग सेवा

स्पर्धेचा पुरस्कार वितरण सोहळा आयोजक अजय विचारे, शरीरसौष्ठव संघटनेचे अध्यक्ष अजय खानविलकर, सरचिटणीस राजेश सावंत, विशाल परब, सुनील शेगडे, किरण कुडाळकर, राजेश निकम, राकेश पांडे, जयदीप पवार यांच्या उपस्थितीत पार पडला. तर नवोदित खेळाडूंना प्रोत्साहन देण्याकरता विक्रांत देसाई निलेश दगडे, उमेश गुप्ता, हर्मीत सिंग, संदीप सावळे, मनोज बोचरे, संतोष भरडकर यांसारखे वरिष्ठ शरीरसौष्ठवपटू उपस्थित होते.

नवोदित मुंबई श्री २०२५ स्पर्धेचा निकाल

• ५५ किलो वजनी गट : १. रमण राठोड (बोवलेकर जिम), २. दर्शन सावंत (जय भवानी जिम), ३.अर्णव वाघ (जेडी फिटनेस), ४. अनिकेत कदम (परब फिटनेस), ५. सोयल मोहम्मद (बाबा फिटनेस).
• ६० किलो वजनी गट : १. धर्मराज जमादार (एम जे ५२ फिटनेस), २. निशांत नांदिवडेकर (श्री दत्तगुरु जिम) ३. रितिक वेरुळकर (पॉवर पॉइंट जिम), ४. चेतन सुतार (श्रीराम जिम), ५. ओम मिस्त्री (बोवलेकर जिम).
• ६५ किलो वजनी गट : १. प्रतिक महाजन (विराज फिटनेस), २. संकेत शिगवण (फिट अँड फाईन), ३. निखिल सावंत (आय क्यू फिटनेस), ४) ब्रॅण्डन डिसूजा (परब फिटनेस), ५. भावेश भंगेरा (शोयब जिम)
• ७० किलो वजनी गट : १. साजिद मलिक( विराज फिटनेस), २. अमन भौमिक ( बॉडी वर्कशॉप), ३. अनिकेत राठोड (कृष्णा जिम), ४. हिमांशू मकवाना (बॉडी वर्कशॉप), ५. रोहन मंगेला (पालकर जिम).
• ७५ किलो वजनी गट : १.हरीश साळुंखे (परब फिटनेस), २. सुरेंद्र नाईक (परब फिटनेस), ३. मनोज माळी (बॉडी वर्कशॉप), ४. सचिन राणे (जय भवानी जिम), ५. पंकज कुमार (पी आर पॉवर फिटनेस).
• ८० किलो वजनी गट : १. फ्रान्सिसको फर्नांडिस (सावरकर जिम). २. रहमतुल्लाह ( आदियांश जिम), ३. शुभम ठाकरे (शिवशक्ती जिम), ४. रितिक पालव (बॉडी वर्कशॉप), ५. पवन डंबे (श्री दत्तगुरु जिम).
• ८० किलोवरील वजनी गट : १. तुषार वाघ ( एज फिटनेस), २. सय्यद फकरुद्दीन (बालमित्र जिम), ३. जमालुद्दीन सय्यद (आर्यन पॅराडाइज), ४. अजय कुमार वर्मा (आर्यन पॅराडाइज), ५. रियान कोळी ( श्री गुरुदत्त जिम).

नवोदित मुंबई श्री : साजिद मलिक( विराज फिटनेस)