Bhima-Koregaon Case : एनआयएकडून मुंबई प्रेस क्लबच्या माजी अध्यक्षांसह तिघांची चौकशी

मुंबई :

भीमा-कोरेगाव प्रकरणाच्या तपासात राष्ट्रीय तपास यंत्रणा (एनआयए) अधिक सक्रिय झाल्याचे दिसून येत आहे. या प्रकरणाशी संबंधित तपासाच्या अनुषंगाने एनआयएने मुंबई प्रेस क्लबचे माजी अध्यक्ष गुरबीर सिंह तसेच क्लबमधून निष्कासित करण्यात आलेल्या अन्य दोन सदस्यांना समन्स बजावून त्यांची चौकशी केली. ही कारवाई १९ जानेवारी २०२६ रोजी मुंबई प्रेस क्लबमध्ये झालेल्या एका बैठकीच्या संदर्भात करण्यात आली.

माहितीनुसार, या बैठकीस भीमा-कोरेगाव प्रकरणातील जामिनावर मुक्त असलेले काही आरोपी उपस्थित होते. या घटनेची अंतर्गत चौकशी करणाऱ्या मुंबई प्रेस क्लबच्या तीन पदाधिकाऱ्यांचे जबाबही एनआयएने नोंदवले आहेत. संबंधित बैठकीचे आयोजन आणि त्यासाठी मदत केल्याचा आरोप करत क्लब प्रशासनाने गुरबीर सिंह आणि इतर दोन सदस्यांचे सदस्यत्व रद्द केले होते.

या संदर्भात क्लबच्या एका सदस्याने तक्रार दाखल केली होती. बैठकीमुळे न्यायालयाने आरोपींना जामीन देताना घातलेल्या अटींचे उल्लंघन झाल्याचा आरोप तक्रारीत करण्यात आला होता. विशेषतः सहआरोपींशी संपर्क किंवा भेटीगाठींवर असलेल्या निर्बंधांचे उल्लंघन झाल्याचा दावा करण्यात आला आहे.

मुंबई प्रेस क्लबने आपल्या नियमांनुसार केलेल्या चौकशीनंतर संबंधित सदस्यांनी बैठकीचे आयोजन अथवा ती सुलभ करण्यामध्ये भूमिका बजावल्याचे निष्पन्न झाल्याने त्यांच्यावर कारवाई करण्यात आली होती. त्यानंतर एनआयएने या प्रकरणाची दखल घेत बैठकीस उपस्थित राहिलेल्या चार आरोपींचा जामीन रद्द करण्यासाठी न्यायालयात अर्ज दाखल केला आहे.

जामीन रद्द करण्यासाठी सादर केलेल्या अर्जात एनआयएने असा दावा केला आहे की, ही बैठक बंदी घालण्यात आलेल्या भाकप (माओवादी) संघटनेच्या विचारांचा प्रसार करण्यासाठी तसेच तथाकथित ‘अर्बन नक्षल’ चळवळीच्या पुढील धोरणांवर चर्चा करण्यासाठी आयोजित करण्यात आली होती. अशा स्वरूपाच्या कृतींमुळे देशाची एकता, सार्वभौमत्व आणि राष्ट्रीय सुरक्षेला धोका निर्माण होऊ शकतो, असे एनआयएचे म्हणणे आहे. या पार्श्वभूमीवर तपासाचा भाग म्हणून संबंधित निष्कासित सदस्यांची सखोल चौकशी करण्यात आली.

Bhima-Koregaon Case नेमके काय?

१ जानेवारी २०१८ रोजी पुणे जिल्ह्यातील भीमा-कोरेगाव येथे झालेल्या लढाईच्या द्विशताब्दी वर्षानिमित्त आयोजित कार्यक्रमादरम्यान दोन गटांमध्ये तणाव निर्माण झाला होता. या घटनेत एका युवकाचा मृत्यू झाला, तर चार जण जखमी झाले. ‘शौर्य दिवस’ म्हणून साजऱ्या करण्यात आलेल्या कार्यक्रमासाठी दलित समाजातील मोठ्या संख्येने नागरिक उपस्थित होते.

विजयस्तंभ परिसरातील मुख्य कार्यक्रम शांततेत पार पडत असतानाच आसपासच्या भागांमध्ये हिंसाचार उसळल्याची नोंद झाली. काही ठिकाणी विजयस्तंभाकडे जाणाऱ्या नागरिकांच्या वाहनांवर हल्ले करण्यात आले. या घटनांमध्ये सानसवाडी येथील राहुल फटांगळे यांचा मृत्यू झाला.

हेही वाचा : Google training : राज्यातील चार लाख शिक्षकांना प्रशिक्षण

या हिंसाचाराच्या निषेधार्थ विविध दलित संघटनांनी महाराष्ट्र बंदची हाक दिली होती. त्यानंतर मुंबई, पुणे, ठाणे, नाशिक, अहमदनगर, औरंगाबाद, सोलापूर आदी शहरांमध्ये निदर्शने, तोडफोड आणि जाळपोळीच्या घटना घडल्या. पुण्यात सुरू झालेला तणाव राज्यातील इतर भागांतही पसरल्याने अनेक ठिकाणी दुकाने, व्यावसायिक आस्थापने आणि कार्यालयांचे नुकसान झाले.