Kho-Kho : माटुंग्यात आजपासून खो-खोचा थरार!

प्रज्ञा वर्धिनी फाउंडेशन आयोजित पुरुष-महिला मुंबई जिल्हा अजिंक्यपद व निवड चाचणी खो-खो स्पर्धा, २४ नामांकित संघांत मुंबई जिल्हा अजिंक्यपदासाठी चुरस, राज्य स्पर्धेसाठी पुरुष-महिला संघांची निवड होणार

मुंबई :

वेगवान हालचाली, चपळाई, अचूक डावपेच आणि विजयासाठीची जिद्द… अशा खो-खोच्या थरारक खेळाचा रंग आता माटुंग्यात चढणार आहे! मुंबईतील नामांकित पुरुष आणि महिला संघांमध्ये जिल्हा अजिंक्यपदासाठी जोरदार संघर्ष रंगणार असून, त्याचबरोबर आगामी राज्य अजिंक्यपद स्पर्धेसाठी मुंबईचे प्रतिनिधित्व करण्याची संधीही खेळाडूंना मिळणार आहे. मुंबई खो-खो संघटनेच्या मान्यतेने व प्रज्ञा वर्धिनी फाउंडेशन आयोजित पुरुष-महिला मुंबई जिल्हा अजिंक्यपद व निवड चाचणी खो-खो स्पर्धा २०२६-२७ ही १९ ते २२ नोव्हेंबर या कालावधीत माटुंगा येथील ॐ समर्थ भारत व्यायाम मंदिराच्या मैदानावर आयोजित करण्यात आली आहे. या स्पर्धेत मुंबईतील जवळपास २४ नामांकित संघ सहभागी होत असल्याने मैदानावर चुरशीचे सामने पाहायला मिळणार आहेत.

प्रज्ञा वर्धिनी फाउंडेशनतर्फे Kho-Kho चे आयोजन

या स्पर्धेचे आयोजन प्रज्ञा वर्धिनी फाउंडेशन यांच्या वतीने करण्यात आले आहे. स्पर्धेतील कामगिरीच्या आधारे मुंबईचे पुरुष आणि महिला संघ निवडले जाणार आहेत. निवड झालेले संघ २८ नोव्हेंबरपासून अहिल्यानगर येथे सुरू होणाऱ्या राज्य अजिंक्यपद स्पर्धेत मुंबईचे प्रतिनिधित्व करतील. त्यामुळे जिल्हा विजेतेपदाबरोबरच मुंबईच्या संघात स्थान मिळवण्यासाठीही खेळाडूंमध्ये चुरस निर्माण होणार आहे. स्पर्धेचे उद्घाटन उद्योजक रोहित राऊळ यांच्या हस्ते होणार आहे. हा उद्घाटन सोहळा १९ नोव्हेंबर रोजी सायंकाळी ५ वाजता, ॐ समर्थ भारत व्यायाम मंदिराचे मैदान, माटुंगा (पश्चिम), मुंबई – ४०००१६ येथे पार पडेल. यावेळी ॐ समर्थ भारत व्यायाम मंदिराचे विश्वस्त उमेश नरवणे (सी.ए.), मुंबई खो-खो संघटनेचे विविध पदाधिकारी आणि अन्य मान्यवर उपस्थित राहणार आहेत.

Kho kho tournament - voice of eastern
पुरुष-महिला मुंबई जिल्हा अजिंक्यपद व निवड चाचणी खो-खो स्पर्धा

Kho-Kho : युवा खेळाडूंसाठी कौशल्य सिद्ध करण्याची संधी

मुंबईतील नवोदित आणि अनुभवी खेळाडूंना आपले कौशल्य, चपळाई आणि खेळातील गुणवत्ता सिद्ध करण्यासाठी ही स्पर्धा महत्त्वाचे व्यासपीठ ठरणार आहे. जिल्हा संघात स्थान मिळवण्याच्या उद्देशाने प्रत्येक सामना निर्णायक ठरण्याची शक्यता आहे. प्रज्ञा वर्धिनी फाउंडेशनच्या विश्वस्त अॅड. रुपाली ठाकूर आणि वैशाली भिडे-बर्वे यांनी ही माहिती देताना मुंबईतील युवा खेळाडूंना आपली गुणवत्ता दाखवण्याची ही उत्तम संधी असल्याचे सांगितले.

बाद फेरीतून साखळी फेरीकडे स्पर्धेचा प्रवास

स्पर्धेच्या सुरुवातीचे सामने बाद पद्धतीने खेळवण्यात येतील. त्यानंतर अंतिम चार संघांमध्ये साखळी पद्धतीने सामने होतील. या स्पर्धा पद्धतीमुळे सुरुवातीपासूनच प्रत्येक संघाला विजयासाठी सर्वस्व पणाला लावावे लागणार आहे.

पुरुष गट : पुरुष गटात श्री समर्थ व्यायाम मंदिर, विद्यार्थी क्रीडा केंद्र, सरस्वती स्पोर्ट्स क्लब, ओम समर्थ भारत व्यायाम मंदिर, वैभव स्पोर्ट्स क्लब, अमर हिंद मंडळ, ओम साईश्वर सेवा मंडळ, युवक क्रीडा मंडळ, विजय क्लब आणि संघशक्ती इ. संघ सहभागी होणार आहेत.

महिला गट : महिला गटात सरस्वती कन्या संघ, ओम साईश्वर सेवा मंडळ, शिवनेरी सेवा मंडळ, अमर हिंद मंडळ, श्री समर्थ व्यायाम मंदिर, वैभव स्पोर्ट्स क्लब, आर्य सेना, ओम समर्थ भारत व्यायाम मंदिर आणि संघशक्ती इ. संघ मैदानात उतरणार आहेत.

जिल्हा विजेतेपदासह राज्य स्पर्धेचे लक्ष्य

चार दिवस चालणाऱ्या या स्पर्धेत मुंबईच्या पुरुष आणि महिला खो-खोपटूंच्या कौशल्याची कसोटी लागणार आहे. जिल्हा अजिंक्यपदाचा मान मिळवण्याबरोबरच राज्य स्पर्धेसाठी मुंबईच्या संघात स्थान मिळवण्याचे लक्ष्य प्रत्येक खेळाडूसमोर असेल. त्यामुळे माटुंग्याच्या मैदानावर रंगणारा हा खो-खोचा महासंग्राम क्रीडाप्रेमींसाठी निश्चितच आकर्षणाचा केंद्रबिंदू ठरणार आहे.

हेही वाचा : Inter-Hospital Cricket Tournament : रुग्णालयांच्या मैदानात क्रिकेटचा महासंग्राम

Views: 1

Related Articles

प्रतिक्रिया व्यक्त करा

आपला ई-मेल अड्रेस प्रकाशित केला जाणार नाही. आवश्यक फील्डस् * मार्क केले आहेत